«Qazaqstan» Ұлттық телеарнасының биылғы жаңажылдық басты жобасы бүгін 21:00-де «Жақсылықпен кел, Жаңа жыл!» атауымен эфирге шығады. Арна тележүргізушілері мен эстрада және кино жұлдыздарының қатысуымен түсірілген мерекелік бағдарлама төрт сағатқа жалғасады. 23:50-де қазақстандықтар ел Президенті Қасым-Жомарт Тоқаевтың құттықтауынан кейін бағдарламаның жалғасын тамашалайды.
Ұлттық арна кішкентай көрермендеріне де мерекелік тарту әзірледі. 31 желтоқсан мен 3 қаңтар аралығында «Disney» компаниясының анимациялық фильмдерінің апталығы өтеді. Бұл күндері әйгілі «Ұйқыдағы ару» («Спящая красавица»), «Мұзды өлке» («Холодное сердце»), «Джунгли кітабы» («Книга Джунглей»), «Бикеш пен Қаңғыбас» («Леди и Бродяга»), «Ральф Интернетке қарсы» («Ральф против Интернета»), «Көліктер-3» («Тачки-3») анимациялық фильмдері синхронды дубляжбен көрсетіледі.
«Бизнес по-казахски», «Бизнес по-казахски в Америке» көркем фильмдері де телеэкранда алғаш рет қазақ тілінде ұсынылмақшы. «Қазақша бизнес» 31 желтоқсан 14:30-да, «Америкадағы қазақша бизнес» фильмі 1 қаңтар күні 23:30-да эфирге шығады.
31 желтоқсан 16:10-да «Егіз лебіз» музыкалық талант-шоуының қорытынды гала-концерті өтеді. Онда жобадағы барлық қатысушылар өнер көрсетіп, ел тұрғындары Ұлттық арна эфирі арқылы күллі қазақстандықтарды Жаңа жылмен құттықтайды.
31 желтоқсан 18:15-те қазақстандықтар «Ázil álemi» театрының жаңажылдық бағдарламасын тамашалай алады. 2 қаңтар 20:00-де «Nur Tileý» бағдарламасының мерекелік шығарылымында әнші, ҚР Еңбек сіңірген қайраткері Мейрамбек Бесбаев қонақ болады.
Мерекелік кестеге сонымен бірге Димаш Құдайбергеннің Нью-Йорктегі концерті, Ернар Айдардың «Қазақтың жігіттері» концерті, «Ән мен әнші» кеші енгізілген.
«Қазақстан» телерадиокорпорациясы Жаңа жылда әр отбасына жақсылық, береке-бірлік тілейді және қазақстандықтарды мерекені үйде отырып қарсы алуға шақырады.
