
«Balapan» телеарнасы 2025 жылға арналған анимациялық жобаларға байқау жариялайды
«Қазақстан» РТРК АҚ «Balapan» телеарнасы өндіруші компаниялар арасында 2025 жылға арналған анимациялық жобаларға питчинг жариялайды.
Жобалардың жанрлық бағыты:
- Оқу-танымдық анимациялық сериалдар. 0-8 жас аралығындағы балаларға арналған танымдық тақырыптар, яғни, қоршаған ортаны тану, айналаны зерттеу, күнделікті тұрмыста кездесетін ұғымдар мен заттарды білу, тұлғалық даму және өмірлік дағдыларды қалыптастыру, кітап оқуға баулуға бағытталған жобалар;
- Шытырман оқиғалы анимациялық сериалдар;
- Бүгінгі күннің батырлары туралы мультхикаялар. Супер қаһармандар, айналасына көмек көрсететін қарапайым кейіпкерлер, балаларды жанашырлыққа, батырлыққа, ерлікке дәріптейтін оқиғалар;
- Жан-жануарлар мен қиял-ғажайып әлеміне құрылған анимациялық сериалдар;
- Экологияны қорғау, табиғат құбылыстары тақырыбындағы анимациялық сериалдар;
- Спорт тақырыбындағы (велоспорт, теннис, футбол, күрес) анимациялық сериалдар. Балаларды салауатты өмір салтын ұстануға баулу және қызығушылығын арттыруға бағытталған жобаларға ұсыныстар қабылданады.
Өтінімдер қабылдау 2024 жылдың 20 тамызынан 30 қыркүйекке дейін korkemdikkenes@balapan.tv электронды поштасы арқылы жүргізіледі.